Geschter bini witerzoge zum Vänern – das isch der gröscht See z Schwede. Dä isch so gross, dasme z angere Ufer nid gseht. Ufere Rossfarm hani es chlises Hüttli gmietet. Fliessends Wasser giz nid, drfür isches süsch üsserscht härzig 😁 Mini Gaschtgäberin, d Patricia, hetmer Tomätli gäh und gseit i dörf im Garte aues abläse woni möcht. Und de hetsi mer no es paar Eier gäh, mis Hüttli isch nämlech diräkt näbem Hüenerstau. Dert geit einiges ab! Für mis Znacht hani du no zimlech wit düre Räge müesse loufe, bis zume chliine Tanksteueshop, wos immerhin gfrorni Lasagne gäh het – z Hüttli het es chlises Öfeli. Wider im Hüttli bini zimlech nass und düregfrore gsi, dr ideal Zuestand auso fürne Outdoor-Duschi. Vier mau Wasser choche wüu z Pfännli so winzig isch, i Kanischter füue und ä Duschbrusä dra – let‘s go!
Hüt Morge de es Highlight: D Patricia het mi ufne Usritt mitgnoh. Si isch quasi Rössliflüschterin und het so liebi Isländer, dass die ou ä Amateur wi mii problemlos mitnähme. U natürlech het si mi vom Schritt übere Galopp bis zum Tölt stouz aues la usprobiere. Mir si de düre Waud gritte u si het mer viu über d Gägend und di drzueghörendi Gschicht verzeut. Im Waud hei bis vor öppe 50 Jahr no Lüt gläbt, i Höline und chline Ungerschlüpf. Ir Region wachse viu spezieui Pflanze, unger angerem säuteni Orchidee, wo nume au sibe Jahr blüie. U natürlech viu Piuzli. D Patricia het mer Pfifferlingä zeigt, woni du zum zmittag gässä ha ☺️ Am Nami hani am See wöue go wandere. Das isch aber leider no schwirig, wüu am See entlang eigentlech nume abwächsligswiis Villene und grässlechi Feriedörfli si, wo d Lüt i regumässige Abständ Kanäu bis zur Siedlig hei boue, dass si nid z wit zu ihrne Böötli müesse loufe. Dr Wäg wome het chönne loufe isch äbe nume fasch am See. Natürlech bini wo müglech glich am See entlang, und i ha aues probiert: Dür Gärte, dür z Dickicht, düre Sumpf. Da bini aber o immer wider i Sackgasse grate. Drum het das ganze viu lenger duuret aus planet, auso hani no dr Bös gnoh für hei.
