Hönö-Duathlon

I däm Hüttli schlaft sechs auso wunderbar. Nachem zmorge bini loszoge, für d Insle z erkunde. Vor Familie wo im Huus näbedranne wohnt hani es Velo chönne bruuche, u so hanis du zimlech wit gschafft. Zersch auerdings nume i Hafe vom Örtli woni wohne – dert isch leider nid viu z wöue gsi, wüu o hie dr Mänti dr Ruhetag für Museä, Läde & Beizä isch 😉 U aagluegt hetme das Züg schnäu gha. Auso bini witer, u nachemne Zitli bini az angere Ändi vor Insle cho. O das: Kes Problem! Übernä Brügg hani nämlech uf di nächschti Insle chönne fahre – öppe glich (schön) wi Hönö. Drum bini nach churzer Zyt de o wider retour – und ha meh per Zuefau es Naturschutzgebiet gfunge. Natürlech hets mi de wungergnoh wi das usgseht, auso Velo abschteuä und los! U es witers mau bini überwäutiget gsi – es isch so schön gsi, dass usem plante Spaziergang ä rächti Wanderig isch worde, rächt aabentürlech über di Steinä, zwüschdüre hani sogar müesse chlättere. Mit mehrerne Pousä zum Läse, wüus eifach so viu schöni Örtli gha het woni ha wöue hocke, hanis de bis i üsserscht Zipfu vor Insle gschafft u dert chönne Sunne tanke. O der Rückwäg het zimlech gfägt. Und i bi säuber erstuunt gsi, aber i ha z Velo diräkt gfunge und ha mi nie verloffe, obwou i natürlech nid am Wanderwäg nache bi (wasme übrigens lut ere Tafele o nid het müesse). Iz bini wider i mim Hüsli u choche mer Pasta 😋