Fasch wi am Meer

Hüt simer vom Vättern a Vänern gfahre – auso vom zwöitgröschte a gröscht See vo Schwedä. Ungerwägs wäremer fasch z Beateberg verbicho, leider hani d Abzweigig knapp verpasst. 😉 Ir Nechi vo Mariestad (wär mi hie scho lenger verfougt, ma sech vilech a mi Spaziergang uf d Landzunge dört erinnere, s isch glii genau 3 Jahr här..) si mer ufere Insle amne gmüetleche Platz ire Bucht. Z freiä campe isch würk eifach nomau öppis angers aus uf de Campingplätz, wobii ja ou die hüüfig geniau schön si. Uf jede Fau simer iz da am See – u natürlech heimer z Kajak wider füregnoh u si loszoge. Da dr Vänern sooo gross isch, gseht mä z änere Ufer nid. U o d Wäue hei eher az Meer erinneret aus a See. Zum Glück simer ja scho trainiert. So simer der Küschte entlang paddlet u hei ungerwägs zwöi einsami Inseli bsuecht. U das aues bi blauem Himmu und viu Sunnä. Ä rächte Wächsu zu dä letschte Täg, u mir heis wahnsinnig gnosse. Mau luege, was d Ärm morn drzue meinä..😵‍💫💪🏼 Uf jede Fau bini froh, heimer tatsächlech es Kajak mitgnoh. Eini vode beschte Ideenä gsi! Üses Znacht heimer überem Füür zuebereitet, u zum Abschluss heimer no ä grandiose Sunneungergang organisiert gha 😉🌅