No chli wach blibe

Nach dä letschte Momos geschter Aabe, paar witere iichöif hüt Morge und nomau Dal bhat zum Zmittag hani hüt e zimleche Kampf mitem Rucksack gha – es hätmer aber o früecher öpper chönne sägä, dasi nid mitemne voue Rucksack cha verreise u när no haub Thamel läärchoufe!😂 Aber i has tatsächlech irgendwie gschafft. Dr Abschied vo mine Fründ*inne ischmer wi erwartet natürlech schwär gfaue. Und si hei mi nid la gah ohni z verspräche dasi wider uf Nepal chume. U de hani no drü verschidnigi Haustüecher mit ufe Wäg brcho, mit buddhistische Zeichnige womer söue Glück bringe ☺️

Dr Flughafe z Kathmandu isch es zimlechs Ghetto, aber i has mittlerwile bis uf Dubai gschafft. Und z Check-In für di nächschte zwöi Flüg het o klappet. Iz warti ufe Flug uf Amsterdam, und i mues kämpfe dasi nid iischlafe 😂 Aber glii chani iistige u chli pfuuse. U de wachi morn morge hoffentlech wider z Europa uf 😁