Mittlerwile simer so viu ungerwägs gsi, dass dr Dave mitem Velo öppe vo überau här dr Heiwäg fingt. I ha da ehrlechgseit no chli meh Müeh – zum Glück chani eifach hingernache fahre 😁
Immer wieder simer (mängisch o per Zuefau) a schöni Orte cho. Geschter simer sogar ufe höchscht Turm vor Stadt. Wüu dä Teil vom Parlamäntsgeböide isch, muesme zersch dürne Sicherheitskontroue wo am Flughafe. Mit verschidnige Lifte und Stäge schafft mes de bis uf d Plattform, wome sogar bis Schwede übere chönnt gseh we z Wätter guet isch. Wahnsinnig lang heimer aber nid umegluegt, es het nämlech zimlech gluftet.
Der Iichoufsstrass heimer ou Zyt gwidmet, dr Dave het nämlech ä Mission gha: ä Mantu z finge. Heter zum Glück gschafft 😁 Und i ha mi Schuehtechnisch für d äi witeri Reis usgrüschtet. Natürlech isch aber bi au däm no gnue Zyt für üses eigentleche Hobby blibe: d Kulinarik 😉 Vor Streetfoodhaue über Bars bis zum Choche ir Wohnig heimers üs la guet gah. Und wüu ja scho Wuchenänd isch, simer geschter no chli i Usgang u hei sit langem mau wider nöime chönne go tanze 🥳
Hi Kai! Jetz ha ig mir ou wieder mau Zyt gno u ha di Blog gläse! So cooool, was du alles erläbsch! Das isch uf jede Fall e Reis fürs Läbe! Freue mi scho uf witeri Brichte! Häb s guet, häb Sorg u gniesses! Christine
Ei,das gseht alles so gluschtig us. Gniessets!Imha o Früüd am Föteli va dier u em Dave.I gfreue mi hie a de wunderbare Herbschtfarbe.Alls Guete witerhin u ganz liebi Grüess Grosi