Vo See zu See

Di letschti Nacht heimer diräkt am See verbracht. Uf park4night hets diversi Plätz markiert gha – und entsprächend si viu drvo ou bsetzt gsi. Mit chli Glück heimer aber ä gäbige Platz gfunge. Vo dört us simer de ou zum erschte mau mit üsem Kajak loszoge u hei dr See erkundiget. Zum Glück waggelets sogar weniger, aus mer erwartet hei 😁

Gäge Aabe hets de grägnet, aber im Bös inne isch das kes Problem. Wobii, iz würde mer de scho ou gärn mau dusse Znacht ässe. Im Momänt hockemer wider im Rägä – ufemne Camping am Vättern, das isch dr zwöitgröscht See vo Schwedä. Mau luege, ob z Wätter hüt no besseret. Dür d Wäuder jogge hättemer für hüt eigentlech plaanet.. eh, mau luegä. Fägt ja ou im Räge chli. Und bade geit äbefaus ohni Problem. Das hani geschter übrigens ou no hurti müesse. U nachem badä im See hani d Duschi im Bös (bzw. hinger usse) mau teschtet. 8/10 würdi sägä, je ei Punkt abzug für z chaute wasser u dr fählend duschvorhang 😅